ياما نشوف فى الدنيا وياما ... والايام اسرار وعجايب
دنيا لاتعرف لها مغلوب .. ولا عمرها بتدوم للغالب
بين اشجان ودموع وليالى .. وامل تاه بين شوق وحبايب
والمكتوب عالناس بتشوفو ... وادى الدنيا وياما عجايب
ليالينا زمان كانت تفاريح .. دلوقت لياللى الشوق بتاريخ
والكلمه وموال العشاق ... من قلبى باقولهم للمجاريح
والدنيا بحورها لعبت بيا ... وعلى فين ياموج حاتودينا
وشراعك خدنا فى تيارة ... واحترنا وتاهت مراسينا
وانا عاشق وتوهنى هوايا ... وامانه يابحور الشوق لتهدى
ورسينى على بر هنايا ... وخلى ليالى الضنا دى تعدى
ضنانى البعد ياروح قلبى ... وصورتك دايما قصاد عينى
تصبرنى فى ليالى الشوق ... وبطيفك تناجينى
وياخدنى الحنينليك ... واسرح مع الذكرى
وشوقى يغالبنى ليك ... ويسابق بالامل بكرة
ولغايه ما ترجع ليا ... تنور فجر ايامى
ويرجع فيك ربيع عمرى ... هاعيش وياك فى احلامى
وياضى العين راح استناك ... انا والصبر ووحدتى
وبادعيلك يارب تعود ... ياحياه قلبى ونور عينى
والكلمه اللى بكتبهالك ... مكتوبه بمشاعر واحاسيس عاشقين
عن ذكرى ايامنا الحلوة ... والعشرة اللى بقالها سنين
بحكيها للدنيا فى غنوة ... من قلبى وانا قلبى حزين
قربك احلام وامانى ... واللحظه بتفوت بسنين
وفى بعدك لوعنى زمانى ... وزودنى اشجان وانين